21.08.09

Y Wal Anifeiliaid

datgelu darn o gelf ecolegol gyffrous yn fuan ym Mae
Caerdydd

Mae Charles Church, YWG a Safle yn falch o gyhoeddi cwblhad y 'Wal Anifeiliaid', gwaith celf ecolegol safle-benodol gan yr artist Gitta Gschwendtner.

Mae'r 'Wal Anifeiliaid' yn rhan o wal 50 metr o hyd, yn rhedeg ar hyd ymyl deheuol 'Strata', datblygiad preswyl newydd yn Century Wharf, Bae Caerdydd. Gellir ei chyrraedd trwy ddilyn llwybr glan yr afon sy'n arwain o Clarence Road tua Chanol y Ddinas.

Mae effaith amgylcheddol datblygiad helaeth Bae Caerdydd yn destun pryder parhaus ac mae amryw o wahanol gamau wedi'u cymryd i liniaru hyn. Bwriad y gwaith celf hwn yw cynorthwyo bywyd gwyllt yn yr ardal ac annog mwy o gynefino. Mae datblygiad tai newydd Century Wharf yn darparu tua 1,000 o fflatiau a thai newydd; bydd dyluniad Gitta Gschwendtner ar gyfer y 'Wal Anifeiliaid' yn ateb hyn gyda rhyw 1,000 o flychau nythu i wahanol rywogaethau adar ac ystlumod, wedi'u hintegreiddio yng ngwead y wal sy'n gwahanu'r datblygiad preifat hwn oddi wrth lwybr cyhoeddus.

Gan ymgynghori ag ecolegydd, crëwyd cartrefi i anifeiliaid o bedwar maint gwahanol, wedi'u gosod yng ngorchudd pren/concrit arbennig y wal i ddarparu wal i Century Wharf sy'n bensaernïol drawiadol ac yn sensitif i'r amgylchedd. Bydd y wal anifeiliaid yn goresgyn y ffin rhwng y preifat a'r cyhoeddus hefyd, gan y bydd bywyd gwyllt yn crwydro'n rhydd rhwng y ddau le.

Am ragor o wybodaeth a lluniau i'r wasg cysyllter ag Emma Price
Rhif ffôn: 0845-241 3684
ebost: emma.price@safle.com
gwefan: www.safle.com

Gwybodaeth gysylltiedig